Hunyango

HINDI na nakagugulat ang dagsa-dagsang paglilipat-bakod ng mga pulitiko sa Partido Liberal. Sa isang kisapmata naging mayorya ang partidong ito sa Kongreso dahil ito ang partido ng nanalong pangulo ng Pilipinas.

Ganito ang kalakaran sa sawimpalad nating bansa dahil wala naman kasing tunay na prinsipyo ang nangungunang mga partidong pulitikal. Pwede silang magpapalit-palit ng kulay gaya ng hunyango o chameleon depende sa kapaligiran o kung saan sila makikinabang.

Kaya ’yung dating mga tuta at tagapagtanggol ng dating presidente e biglang lumipat at kumakahol ngayon depende sa kumpas ng bagong amo. Kaya ’yung mga pulitikong walang kahihiyang nagsayaw ng Cha-cha para kay Aling Gloring e walang kahihiyan ngayong nangangakong sosoplahin ang panukalang Cha-cha ng dating pangulo na ngayo’y kasama na nilang nakatira sa Bahay ng mga Kinatawan.

Nakakapanindig-balahibo ang kakapalan ng mukha ng mga pulitikong palipat-lipat at papalit-palit kahit walang malinaw na dahilan kundi sariling kaligtasan o ganansya. Alam kasi nilang hindi mapuputol ang dating ng kanilang pork barrel kung kakampi nila ang namimigay nito. Alam na nila kung sino sila.

Ang kabilang dulo ng mga partidong “mainstream” e ang ilang makakaliwang partido na may tendensyang maging “sectarian” naman o panatikong sarado. Isang halimbawa ang ginagawang pag-atake ng isang grupong makakaliwa sa dating kakamping sina Etta Rosales at Risa Hontiveros dahil lamang kakaiba ang bersyon nila ng pagiging “kaliwa.”

Nanghihinayang ako at hindi nakapasok sa Senado sina Hontiveros, Ka Satur Ocampo at Lisa Maza dahil nagkaroon sana ng kinatawan ang kaliwa kung nakapasok sila. Sigurado namang hindi magbabago ang sistema ng pamahalaan kung naroon sila pero nagkaroon sana ng boses ang masa kahit mahina.

Nakalulungkot ding makita na hindi na nga solido ang kaliwa, personal pa kung magbanatan sila sa publiko. Sino ang maniniwala, halimbawa, na kakampi ng human rights violators si Etta Rosales at hindi siya bagay ilagay sa Commission on Human Rights? Sino ba ang tingin nilang bagay sa CHR? Hindi ba dapat silang matuwa na ang “burgis” na pamahalaang ito e handang humirang ng mga taong galing sa kaliwa at sa gayon ay mapalawak ang larangan para sa tinatawag nilang rebolusyon?

Ito rin ang linya nila nang akusahan si Hontiveros ng pakikipagkaisa sa mga berdugo ng bayan at mga panginoong maylupa noong panahon ng kampanya; ginagawa nila iyon habang ipinagtatanggol nila ang isa ring panginoong maylupa at inaakusahan ng corruption na si Manny Villar.

Hindi ba sila pwedeng maging masaya para sa mga hindi nga nila kakampi pero nagmamalasakit din sa bayan at pinapayagan ng administrasyon na magsilbi?

Ang totoo nga niyan baka hindi rin magtagal sa pwesto ang mga kagaya ni Etta tulad ng nangyari sa mga Leftists na itinalaga ni Tita Cory sa gabinete niya noong katatayo pa lamang ng kanyang “revolutionary” government.