Bigas todo

KUNG paniniwalaan mo ang sinasabi ni Joselito Banayo na bagong hepe ng NFA, maiisip mong “ang laki” naman ng problema niya.

Akalain mong “naliligo” pala sila sa bigas ngayon? E bakit hindi man lang matalsikan ng ipinaliligo nila kaming mga hampaslupa na matagal nang nangangarap na makapagsaing at makakain ng murang bigas?

Sa huling basa ko ng sarbey ng Social Weather Stations, apat na milyong kabahayan ang nakararanas ng gutom sa bansa nating nililiyag. Kung may karaniwang anim katao sa isang kabahayan, aba’y 48 milyon na agad ito. Ano pa ang hinihintay ng NFA, Pasko?

Kung lumalangoy ang NFA o nagtatampisaw sa sobrang bigas, dapat e ipamigay na agad iyon sa mahihirap nang wala nang esep-esep bago pa man tuluyang mabulok ang istak gaya ng nangyayari umano sa ilang bodega nila na halos hindi na maisara dahil sa umaapaw na bigas. (Bweno, medyo exaggerated naman na hindi maisara ang mga bodega, pero mismong si Joselito ang nagsabing naliligo sila sa bigas. Sabagay mas masaya ‘yun kesa sa ginawa noon ni Manny Villar na lumangoy sa dagat ng basura.)

Ang kaso, marami pang kuskos-balungos itong NFA. Kesyo kelangan pang pag-aralan kung pabababain ang presyo o alamin kung sino ang may kasalanan sa pag-aaksayang ito at paglustay sa pera ng bayan.

Pwede nilang pag-aralan kung anuman ang gusto nilang pag-aralan – bumalik pa sila sa eskwelahan kung gusto nila – basta ipamigay na sa mga nangangailangan ang bigas. Wala na silang magagawa, tutal nariyan na rin lang ang sobrang suplay at nalugi na ang gobyerno sa sobra-sobrang inangkat na bigas, hayaan na lang pakinabangan ito ng mga tao. Tapos habulin nila ang mga simbergwensa at walang pakundangang nag-angkat ng bigas.

Resulta nga ba ito ng panic-buying ng gobyerno o ng pagkaganid ng nasa kapangyarihan? Maaalalang kailan lang e umangkat din sila ng sobra-sobrang asukal dahil nagkaroon ng artipisyal na pagmamahal nito sa palengke. Meron bang nakaalala nito? May nagreklamo sandali pero dahil makakalimutin tayo, nailibing na lang ang isyung ito sa limot. (Huwag sanang mangyari ito sa kaso ng Ampatuan massacre. Hindi ba’t kay Dayunyor na lang nakatuon ang pansin ng lahat at nakalimutan na ang pangako ng military na magpaliwanag tungkol sa mga armas at bala na may tatak ng DND na natagpuan sa pag-iingat ng mga Ampatuan?)

Hindi pa tapos ang kalbaryo umano ni Joselito; meron pang darating na isang milyong sako ng bigas galing Vietnam at sasabay iyon sa anihan dito sa Pinas. Ibig sabihin nito kukumpitensyahin ng imported na bigas ang lokal na bigas. E dahil mas mura ang imported na bigas, dehado ang lokal. Mapipilitang ibenta nang palugi ng mga magsasaka natin ang kanilang produkto.

Ang solusyon ng NFA, pakiusapan ang Vietnam na huwag munang i-deliver ang bigas. E sigurado namang sasabihin sa kanila ng Vietnam: “Ano kayo sinuswerte? May kontrata tayo at saka puno na rin ang mga bodega namin, wala kaming paglalagyan niyan.”